Dengue bukhar ki alamat aur ilaj

Dengue bukhar ki alamat, ilaj aur gharelu totkay

Duniya ke beshtar mumalik ki tarah Pakistan mein bhi aaj kal dengue bukhaar ki wabaa taizi ke sath phail rahi hai. bad qismati se is ke phelao ki barri wajah munasib hifazati iqdamaat aur agahi ka nah hona hai. Aur shayad isi wajah se aam si bemari mohlik aur khatarnaak soorat ikhtiyar kar layte hai. Dengue bukhar ko ( Break Bone Fever ) ke naam se bhi jana jata hai. Kyunkay bukhaar ke drwan hadion aur pathon mein itna shadeed dard hota hai ke haddiyan tuutatii hui mehsoos hoti hain.

Dengue bukhar aik makhsoos kisam ke madah machar ( Aedes Aegypti ) ke katnay se phialta hai jo aam tor par saaf pani mein parwarish paata hai. Is machar ki jasamat aur tangen aam machar ki nisbat barri aur lambi hoti hain. Kisi mutasir shakhs ko katne se dengue bukhar ka virus machar mein ajata hai aur agar yeh machar kisi dosray shakhs ko kaat le to yeh virus is shakhs mein muntaqil ho jata hai.

Dengue bukhar un logon ko zyada mutasir karta hai jinki qowat e mudafat kam hoti hai jabkay bachay aur kamzor sehat ke haamil afraad bhi is bemari se ziyada mutasir hotay hain. Dosray macharon ke bar aks dengue bukhar ka baais banane wala machar ziyada safai pasand hota hai. yeh ganday pani ke johrhon aur gharhoon ki bajaye gharelo water tnkyon mein ya un ke qareeb, saaf pani se bharay bartano aur barish ke saaf pani mein taqreeban sara saal hi palta rehta hai.

Chaar mukhtalif qisam ke virus insano mein dengue bukhar ka baais bantay hain aur aik qisam ke virus ka hamla sirf aik baar hi hota hai. Doosri martaba bukhaar dengue ki doosri qisam ki wajah se ho sakta hai, aur yun zindagi mein kisi bhi shakhs ko ziyada se ziyada 4 baar yeh aarzah la-haq ho sakta hai. Dengue phelanay wala machar umooman tulu aftaab ya ghuroob aftaab ke waqt kaatta hai. Agar is ka bar waqat ilaaj na karwaya jaye to yeh jaan lewa saabit hota hai.

Dengue bukhar ki alamat


Dengue bukhar ki mandarja zail alamat ho sakti hain.

  1. Taiz bukhar, jism ka aik dam sard ho jana,
  2. Jism, pait ya aankhon ke peeche shadeed dard,
  3. Jild par kharish ya surkh dhabbe ka namudar hona aur bukhaar ka khatam ho jana,
  4. Naak ya muh se khoon aana aur saans lene mein dushwari hona,
  5. Baar baar ulti aur behoshi tari hona, kamzori aur pasina aana,
  6. Kalay rang ka pakhana aana ya qabz hona,
  7. Bohat ziyada pyaas lagna ya mun ka khushk hona,
  8. Dil ki dhadkan ka taiz hona, blood pressure kam ho jana waghera.

Agar in mein se koi bhi alamat zahir ho to foran Doctor se rujoo karen. Alamaat baggar jayen to dengue bukhar hemorrhagic bukhar mein tabdeel hojata hai. Bukhaar ki is qisam mein khoon se Platelets ki tadaad kam hojati hai, jism se bleeding shuru ho jati hai aur khoon mein shaamil Plasma bhi kharij honay lagta hai. Blood pressure bohat lo hojata hai, jigar kaam karna chore deta hai aur mutasirah shakhs komh mein chala jata hai.

Dengue bukhar se bachao aur ahtiyati tadabeer

Ilaaj se ziyada agar ahtiyati tadabeer aur bachav ke iqdamat apane jayen to dengue bukhaar se bacha ja sakta hai. Dengue bukhaar se bachao ke liye mandarja zail ahteyati tadabeer apnayen.

Iss bimari par qaboo pane ke liye macharon ka khatma karna zaroori hai. macharoon ki afzaish ziyada tar gharon mein pani jama karne ke bartano, poudoun, pani ki tnkyon, water cooler, istemaal shuda tyre aur aisi jaghen jahan baarisho ka pani jama ho wahan hoti hai. un tamam jaghon se pani ko khatam karne ki koshish karen ya usay dhaanp kar rakhen.

Ghar mein machron ko bhagane ka spray kare. jism par Repellent lotion ya kareem ka istemaal karen. Poori aasteen ke kapray pehnein, raat ke waqt machar maarny walay coil wagra astamal karen aur jaali ya net ( Machar Daani ) ke andar soyen, ghar ke ird gird ke mahol ko saaf rakhen.

Munasib iqdamat kay bawajood agar macharon ki tadaad mein kami na ho to muqami intizamia se darkhwast karkay ilaqay mein machar maar spray karwaen.

Dengue bukhar ka ilaj


Dengue ki tasdeeq ke liye doctor khoon ke test aur excer y waghera kerwatay hain. ِIss marz se bachney ke liye koi vaccine mojood nahi is liye ahteyati iqdamaat apna kar hi is marz se bacha ja sakta hai. Tasdeeq hotay he doctors mutasira mareez ke jism me namkiyat ki miqdaar ko berhate hain aur dard kam karne ke liye adwiyaat dete hain, agar hemorrhagic bukhar ho to mareez ko Platelets lagatay hain.

Dengue se mutasir mareez ka temperature 102 degrees Fahrenheit se kam rakhe, dard ki shiddat kam karne ke liye sirf paracetamol tablets dain disprin aur Brufen tablets har gaz nah den.

Dengue se mutasir mareez ko uski normal khurak ke sath sath ziyada miqdaar mein pani, namaqool ya lemon pani, taaza phalon ka juice, soup aur doodh waghera dein taaki is ke jism mein qowat e mudafiet peda ho.

Dengue bukhar ke liye gharelu totkay

Dengue bukhaar se nijaat ke liye aap munasib ilaaj ke ilawa mandarja zail mein bayan kiye gaye gharelo nuskhon par bhi amal kar satke ya sakti hain. Bayan kiye gaye totkay dengue bukhaar ke liye azmooda hain aur jism mein qowat mudafat peda karne mein behtareen hain.


Dengue bukhar ke mareez ke khoon mein platelets ki tadad bohat kam ho to usay har aik ghantay baad 1 glass bakri ka doodh pilain. is se aik hi din mein plate lets ki tadaad 5000 se 80000 ho jati hai.


Papita ke pattay bhi dengue ke marz ka Shafi ilaaj hain, Papita ke 2 taaza pattay le kar uska ras nikal len, subah shaam mareez ko pilain, platelets chand ghanto mein behtar ho jayen ge.


Kaali mirch 1 chamach, kalonji aik chamach, Chirata ke chand pattay, afsanteen (common wormwood) 10 gram bareek pees len. Ek garam din mein 3 martaba ajwain aur pudina ke qehway ke sath dengue bukhaar ke mareez ko den. 2 din mein mareez tandrost ho jaye ga.


Dengue bukhar ki shiddat kam karne ke liye 3 gram choti alaichi powder aur 12 gram barg tulsi mila len. din mein 2 martaba qehway ke sath mareez ko den to bukhaar ki shiddat aur dard kam ho jata hai.


Ek chamach shahad ko 1 cup neem garam pani mein mila kar subah nehar mun aur dopehar o raat ke khanay se 1 ghanta qabal piyen. Uskay ilawa royal jelly dengue bukhaar ke liye taaqatwar anti infection ghiza hai.

Dengue bukhar se mutasira afraad Vitamin K, Vitamin B aur Vitamin C par mushtamil khoraak ziyada se ziyada istemaal karen. Roz maraah ghiza mein chawal, moong ki daal, shaljam, chakandar, gaajar, band gobhi, angoor, aanar, sangtrah, saib aur mosammi waghera ka istemaal bhi is marz mein mufeed hain.

About the author

Beauty

Zubaidabeauty.com Pakistan ki pehli Urdu Website hai jahan mard o khawateen beauty tips, makeup tips, health tips, wazan kam karne ki tips, aur bohat se mufeed gharelo totkay Roman Urdu mein parh satke hain.

Add Comment

Click here to post a comment

Please enter a CAPTCHA value. *