You are now here at: HomeMakeup tips aur tutorialEID makeup tutorial
EID makeup tutorial
Makeup tips aur tutorial

EID makeup tutorial

EID khushiyon ki soghat le kar aati hai aur iss musarrat moqay par har aurat ki dili khwahish hoti hai ke eid ke din un ka makeup achay se acha rahay aur un ke husn ko bhi chaar chaand lag jayen. EID ke roz rang barangi choorian, kapray, jootay aur mehndi ke khobsorat aur dilkash design jahan khoubsurti mein ahem kirdaar ada karte hain wahan eid makeup ko bhi barri ahmiyat haasil hai.

Khawateen ko aam dino mein bhi makeup ki zaroorat hoti hai kyunkay duniya mein koi bhi aisi khatoon nahi hai jisay khobsorat ban-na pasand nah ho, lekin eid khasosan khoshion aur sajney sanwarne ka din hota hai. Iss din khawateen ko ghar ke kaam kaaj ke sath sath bachon aur mehmanon ko bhi waqt dena parta hai. Waqt ki kami ke baais baaz auqaat woh beauty palr nahi ja sakti ya baaz khawateen beauty polar ka kharch bardasht nahi kar sakteen.

Aaj ke jadeed daur aur aave roz badalte fashion trends mein makeup bunyadi kirdaar ada karta. Bad qismati se bohat kam larkiyon ko acha makeup kar ke sawarna aata hai kyunkay makeup karna har kisi ke bas ki baat nahi hoti. Makeup ke douran agar makeup ke usoolon par amal kya jaye to makeup se chehra haseen aur shagufata shagufata nazar aata hai jabkay makeup ko jald ki rangat ke mutabiq nah kya jaye to husn gehna jata hai bajaye khoubsurti ke aur bura lagta hai jug hunsaai allag se hoti hai.

Aisi khawateen jin ke paas beauty parlor ja kar makeup karwanay ka time nah ho ya jo beauty parlor ka kharch nahi utha sakti woh mandarja zail mein bayan kiye gaye eid makeup tareeqay se apna make up ghar par ba aasani kar sakti hain.

EID makeup tips


Mandarja zail mein eid make up ke liye chand tips bayan ki gayi hain, agar aap un ko mad nazar rakh kar apna eid makeup karen to shayad aap ko beauty palr se makeup karwanay ki zaroorat nahi parre gi.


Eid fashion ka din nahi balkay mazhabi tehwar hai is liye eid ke roz saada makeup hi acha lagta hai. make up ke drwan dressing table se tamam ghair zaroori ashya ko hata den taakay waqt ki bachat ke ilawa dheyaan make up par rahay.

Isskay ilawa chehray ko achay sabun se dhowen warna makeup jaazib nazar nahi hoga. Makeup ke douran qabil istemaal ashya ki safai ka khaas khayaal rakhen bilkhushoos brush waghera ka.


Water base, face powder ka rang aik jaisa hona zaroori hain agar in mein yaksaniyat nahi hogi to face base kabhi be theek nahi banay gi, base hamesha apne chehray ki jald ke rang ko mad-e-nazar rakhtay hue istemaal mein lana zaroori hota hai taakay chehra ziyada ujla ujla aur khobsorat dikhayi de.


Makeup se pehle janch partaal karlen ke makeup ki ashya poori hain aur kisi achay brand ki hain kyunkay market mein naqal asal se barh kar dikhayi deti hai. Khushk jald pay make up karne se pehlay cleansing milk se 5 minute tak massage karen. make up karte waqt jald baazi se kaam nah len.

Agar bayan kiye gaye usool o zawabit ko mad-e-nazar rakhtay hue aap apna eid makeup karen to yaqeenan eid ke roz aap ki khoubsurti ko chaar chaand lag jayen ge.

Eid makeup ka tareeqa


Eid ke din aap ke liye khubsurat, shadaab aur taaza dam dikha yi dena nihayat zaroori hota hai. Agar ghar ke deegar kamon ke ilawa kitcehn ki zimma dariyan bhi aap ne sambhaal rakhi hain to aap ko chahiye ke chehray ki safai waghera chaand raat ko hi karlen. Iss se chehray ki taazgee barh jaye gi aur makeup bhi acha ho ga.

Chaand raat ko sonay se pehlay balon mein name garam sarson ka tail laga kar massage karen aur malmal ke dopte se sir dhaanp kar so jayen. Eid ki subah uth kar sab se pehlay balon mein shampoo aur conditions karen. Isskay baad ghar ke zaroori kaam kaaj khatam karne ke baad neha dho kar make up shuru karen.

Eid makeup karne ke liye aap ko mandarja zail makeup ashya ki zaroorat hogi.

  1. Face wash, Face mask
  2. Cleansing milk aur lotion
  3. Skin toner, concealer, face base aur face powder
  4. Eye shadow, Eyeliner, mascara
  5. Lip pencil, lip gloss aur lip stick

Eid makeup shuru karne ke liye mandarja zail hadayat par amal karen.


Sab se pehlay chehray ko kisi achay face wash se dho kar khushk kar len. Iss ke baad chehray par cleansing milk se 5 minute tak massage karen. Tissue paper se chehray par lagi tamam kareem saaf karen, naak, kaanon aur aankhon ke ird gird ki jaghen bhi achi terhan saaf kar len.

Isskay baad roi par toner laga kar is se chehray ki safai karen. Phir kisi achi kareem ya moisturizing lotion se dobarah chehray ka massage karen aur 7 se 10 minute tak steam len. Baad mein chehray ko toliye se saaf kar ke ice cubes se tikor kar len.


Cleansing aur moisturizing ke baad chehre par facial mask apply karen, aur is drwan aankhon par aalo ya kheeray ke qatlay rakh kar late jayen. Mask khushk honay par chehra dho kar kyir kareem ya moisturizing lotion laga len. Chehray ke sath hathon aur paon ka saaf aur khobsorat hona bhi zaroori hai jis ke liye aap manicure aur pedicure kar sakti hain.


Isske baad sab se pehlay concealer se chehre par dots lagayen aur phir hathon se chehra thapthpain taakay concealer achi terhan se jild mein jazb ho jaye. Phir chehray aur gardan par foundation lagayen ya pain cake se halka saanch day kar sponge se face base ko barabar kar len. Foundation laganay ke baad chehray ko paanch minute tak chore den, phir chehray par fees powder se halka sa touch den kyunkay subah ke waqt make up ko halka rakhna hi behtar hota hai.

Aksar khawateen face base ya foundation ke intikhab mein susti se kaam layte hain. Hamesha halka geela foundation istemaal karen, foundation ka rang hamesha gardan ki rangat se milta jalta ya is se aik number halka khareedain. foundation ko barabar karne ke liye geela spnj istemaal karen.


Ab aankhon ke papooton par eyeshadow ki halki si teh lagayen. Eyeshadow hamesha do rangon ka istemaal karen pehlay dark aur baad mein light colour karen. Eyeshadow lagatay waqt aankh par shade ko neechay se oopar ki janib d shape den kyunkay D shape se ankhen barri, mouti aur khobsorat dikhayi deti hai. Isske baad eyeliner ki patli lakeer khech len aur palkon par mskara ka aik coat apply karen. Jab pehla coat sookh jaye to dosra coat laga kar brush ki noke se palken allag kar len.

Mascara palkon ke oopar lagaya jata hai aur palkon ko upar ki janib rule kya jata hai taakay palken, lambi aur ghani nazar ayen jabkay neechay wali palkon ko seedha kya jata hai.


Honton par lipstick apply karne se pehle brush pencil se honton par out line bana len. Aur phir shaistagi se honton par lip stick lagayen. lipstick ki chamak der tak barqarar rakhnay aur usay water proof bananay ke liye aap lipgloss ya shiner ka istemaal kar sakti hain.

Lip pencil dark aur lipstick light color mein istemaal ki jati hai. lip pencil se honton ki shape wazeh aur numaya hojati hai lip pencil putlaay hont par bahar ki janib jabkay motay honton pay andar ki janib lagai jati hai. Lipstick hamesha bareek brush ke sath lagayen.


Aakhir mein balon balon ko suljha kar seedhi maang nikaal len. Agar aap baal khulay chhorna chahti hain to khulay chore den warna chouti bandh len aur apni pasand ki jewellery pehan len. Khuwa aap kitni bhi tayyar ho jayen agar khushbu nahi lagayen gi to aap ko kami si mehsoos ho gi lehaza apni pasand ka prfume lagana mat bhulen.

Lijiye aap ka eid makeup mukammal ho gaya, eid ke liye bnwaye gaye kapray aur jotiyan pehnein aur kamray se bahar ajayeen. Bohat se log aap ko eid mubarak kehnay aur bachay aap se aidee lainay ke muntazir hunge.

About the author

Beauty

Zubaidabeauty.com Pakistan ki pehli Urdu Website hai jahan mard o khawateen beauty tips, makeup tips, health tips, wazan kam karne ki tips, aur bohat se mufeed gharelo totkay Roman Urdu mein parh satke hain.

Add Comment

Click here to post a comment

Adsense Ads