Hamal ki ibtidai alamat

Early pregnancy symptoms and signs in Urdu

Jinsi milap k doran money ka jism aur anday ke milaap se hamal thar jata hai. Yeh soorat e haal aam tor par is waqt waqay hoti hai jab miyan biwi baghair kisi Maney hamal ke jinsi milaap karte hain. Khawateen mein hamal ka aaghaz mahinay ke aik khaas waqt par hota hai yani agar periods ke baad mubasrat ki jaye to haamla honay ke ziyada imkanaat hotay hain.

Baaz auqat ibtidai hafton mein hamal ki ibtidai alamaat ko janna mushkil hota hai. yun to hamal ki bohat si alamaat hain un mein se kuch haamla khawateen khud hi maloom kar layte hain aur kuch alamaat Lady Doctor jismani imthehaan ke baad maloom karti hai.

Hamal ki ibtidai alamat


Mandarja zail me hamal ki ibtidai alamaat (Early pregnancy signs and symptoms) batayi gayi hain jinhein parh kar aap yeh taayun kar sakti hain ke aap haamla hain ya nahi. Yeh alamtain un aurton ki hain jin ka pehla hamal ho.


Hamal ki pehli alamat mahwari ka band hona hai. Amuman haamla aurat ko 28 din ke baad baqaida haiz nahi aata aur agar do hafte mazeed guzar jaye to hamal karar pa jane ka shuba qudrati hai. Baaz auqaat mahol ya aabb o huwa ki tabdeeli, bemari, jismani ya zehni sadme se bhi mahvari band ho jati hai.

Lekin agar dusra mahina bhi saaf guzar jaye tu hamal ki alamaat zahir hone ya nah hone se hamal ki tasdeeq ya tarweed ki ja jati hai.


Hamla honay ki doosri barri nishani pastanoo mein tagayur hai. Hamla aurat ki chhatiyan bhaari aur sakht ho jati hain, un mein narmi peda ho jati hai aur nipple bhi numaya aur mouti ho jati hain. Nipple ke gird ka Haala gehra siyah ho jata hai aur is ka phelao bhi 3 inch tak barh jata hai. Iske sath hi chatiyon (breasts) ki nason mein khoon ki gardish taiz ho jati hai aur un mein khoon ka dabao saaf dikhayi deta hai.


Hamla honay ki teesri bari alamat matli aur qay hai. Hamal tehrane ke taqreeban 2 hafte baad hamla aurat ko matli aur qay ki shikayat ho jati hai, yeh shikayat takrbain 12 hafton tak jari rehti hai aur din mein kisi bhi waqt ho sakti hai.

Baaz aisi aurtain bhi hain jin ko dron e hamal matli ya qay shikayat bilkul nahi hoti aur hamal ke istiqraar ke taayun ke liye aurat ko matli aur qay hona zaroori nahi hai.


Hamal thehray ki chothi alamat pishaab ki kasrat ya zayad-ti hai. Hamal ke sabab reham yani bacha daani phelnay lagti hai aur is ka dabao masanay par parney lagta hai. Jiski wajah se ibtidayi hafton mein aap ko baar baar pishaab ki haajat honay lagi gi. Is shikayat ka koi tadaruk nahi ho sakta. Ibtidayi 12 hafton ke baad yeh shikayat khud bakhud jati rehti hai Albata zichki se 2 haftay qabal phir lout aati hai.


Hamal ki panchwin alamat reham (vagina) se luaab daar ratobat ka ikhraj hai. Hamal thehrnay ke baad reham se pani ki tarah ka raqeeq kharij honay lagta hai. Aur jin aaza ka talluq bachay ki paidaiesh se hai un mein khoon ki gardish taiz hojati hai jiski wajah se vagina se pani ki terhan ka luaab daar madah kharij hone lagta hai.

Agar maday ka ikhraj ki miqdar badh jaye to doctor se mahswara karna chahiye. Yeh bhi ain mumkin hai ke alamat siray se gayab hon aur istiqrar hamal ho jaye.


Pait ka badhna bhi hamal ki alamat mein se aik wazay alamat hai. 3 mahinay baad haamla aurat ka pait bherne lagta hai, aur panchwin mahinay chupaye nahi chupta. Lekin baaz waqt pait mein phora honay ki wajah se bhi pait barh jata hai, agar hamal ki doosri alamaat zahir nah hon aur sirf pait hi bara sun-hwa ya is mein boj mehsoos ho to foran dr ko dikhnana chahiye.


Pait par daharian (Stretch Marks) parna bhi hamal ki aik wazay nishani hai. Hamal thehrane ke 4 se 5 mahinay baad pait ke nichale hissay, pairron aur ranon par gulaabii zeng ki daharian par jati hain. Aisa maloom hota hai jaisay khurachnay se nishaan par gaye hon. Asal mein reham ka bharne se un maqamat ki nichli jald phatt jati hai yeh daagh qareeb qareeb har maa ke pait par hotay hain un ko aib nahi samjhna chahiye.

Doctori checkup se hamal ki tasdeeq


Mandarja baala alamaat woh theen jinki madad se haamla khatoon khud apne hamal ki tasdeeq kar sakti hai. Lekin kyunke yeh yakeeni nahi hain is liye lady doctor hamla khatoon ka checkup kar ke hamal ki tasdeeq ya tarweed karti hai.

1. Baqaida checkup ke liye sab pehlay lady doctor yeh dekhatii hai ke reham phelao hai ya nahi. Reham ka checkup uss waqt kiya jata hai jab mahwari band hue 2 mah ya is se ziyada ka waqt guzar chuka ho. Is checkup se kisi qisam ki takleef nahi hoti, agar reham khilaaf mamool phela hwa hai to yeh hamal thehray ka saboot hai.

2. Pait mein 3 mahine tak ke bachon ko kacha bacha aur is ke baad walay ko janeen kehte hain. Agar hamla aurat ke pait mein zindah bacha ho to 20 ya 25 haftay mein is ke dil ki dharkan wazay suni ja sakti hai. Lady doctor stethoscope ki madad se janeen ke dil ki dharkan sunti hai. Agar doctor yeh dharkan sun le to haamla honay mein kisi shak o shuba ki gunjaish nahi rehti.

3. Hamal ki tashkeel mein ultrasound scan sab se qabil aetmaad tareeqa hai. Agar hamal ke thehray mein shuba ho to 12 haftay baad ya 18 haftay ke shuru mein ultrasound karana chahiye. Pait mein agar bacha ho ga to is ka dhancha screen par wazay nazar aaye ga, 12 ya 18 hafton se pehlay ultra savnd karana maa aur bachay dono ki sehat ke liye munasib nahi hai.

About the author

Beauty

Zubaidabeauty.com Pakistan ki pehli Urdu Website hai jahan mard o khawateen beauty tips, makeup tips, health tips, wazan kam karne ki tips, aur bohat se mufeed gharelo totkay Roman Urdu mein parh satke hain.

1 Comment

Click here to post a comment

Please enter a CAPTCHA value. *