You are now here at: HomeGharelo tips aur totkayBeauty totkay
Urdu beauty totkay
Gharelo tips aur totkay

Beauty totkay

Mosami tabdeeli, Sooraj ki shuaon, maholiyati aloodgi, cosmetics ka istemal, ghair munasib tarz e zindagi aur dekh bhaal ke sath sath infection aur bemariyan aap ke chehray, honton, hathon aur paon, balon aur aankhon waghera ko nuqsaan pouncha ti hain. Hum mein se bahut se log bil-khusus khawateen un pareshaniyon se bachney aur khoubsurti haasil karne ke liye bazaar mein milnay wali krimin, lotion aur adwiyaat waghera ka bohat ziyada istemaal karti hain.

Issi wajah se baazaaron mein cosmetic ki dukanain aisi creams, lotion aur beauty products se bhari pari hain jo chand din mein khoubsurti haasil karne ka daawa karti nazar aati hain. Aisi beauty products nah sirf mehngi hoti hain balkay un ka baqaida istemaal aap ki khoubsurti ko baaz auqaat badhaane ki bajaye mazeed kharab kar deta hai. Iss ke bar aks agar gharelu beauty totkay aur tips istemaal ki jayen to khoubsurti aur husn ke sath sath aap paison ki bachat bhi kar sakti hain.

Beauty totkay

Mandarja zail mein mard o khawateen ke liye aasaan aur kaaramad beauty totkay aur gharelo tips batayi gayi hain, jo chemical se bani cream aur lotion ke muqablay mein ziyada faida mand aur kam kharch hain. Apkee aasani ke liye chehray, honton, aankhon, balon, hathon aur peeron ke liye beauty totkay alehda alehda likhay gaye hain taakay aap jism ke har hissay ki dekh bhaal behtar andaaz se kar saken.

Chehray ke liye beauty totkay



Chehray se chaiyan aur blackheads khatam karne ke liye 1 khanay ke chamach lemoo ke ras mein 1 chuttki Boric powder aur 1 chuttki cheeni mila kar kisi bottle mein daal kar kuch dinon tak fridge ya thandhi jagah par rakh den. Iskay baad chehray ki chaiyan aur black heads par lagayen to woh chand din mein khatam ho jayen ge.


Chehray se acne ke nishan dur karne ke liye 3 chaye ke chamach khushk tulsi ke pattoun ko 1 cupp pani mein taqreeban 20 minute tak ubaal len. jab pani thanda ho jaye to mutasirah jald par roi ki madad se lagayen, chand dinon mein danay daur ho jayen ge. Allo ke qatlay chehray par ragrain, chand din aisa karne se jald naram o mulaem aur safaid ho jaye gi.


Doodh ka istemal chehre ki jild ko saaf o shaffaf aur naram o mulaem bananay mein bohat mufeed hai. Taaze doodh mein roi bigho kar is se chehra saaf karen, aur taqreeban 30 minute baad thanday pani se dho len. Yeh amal rozana karen chand hafton mein jald naram o mulaem aur safaid ho jaye gi.


Siyah rang ko surkh o safaid bananay keliye aik bottle mein 2 chaye ke chamach Roghan badam aur 250 gram Arq ghulaab mila kar rakh len. Rozana raat ko sonay se pehlay chehray ki safai karen. Iskay ilawa Aloe Vera jell, tamatar aur gajar ka ras barabar miqdaar mein le kar paste bana len. Raat ko sonay se pehlay chehray par lagayen aur subah garam pani se dho len, chand din mein jald safaid aur chamakdar ho jaye gi.

Aankhon ke liye beauty totkay



Palken ghani aur khubsurat banane ke liye mskara brush len aur usay rozana raat ko sonay se pehlay caster oil mein bigho kar palkon par andar se oopar ki taraf mein lagayen, chand din aisa karne se palken ghani aur khubsurat ban jayen gi. Isskay ilawa roi ki madad se Roghan Zaitoon palkon aur aayi burrows par laganay se palken aur aayi burrows ghany ho jatay hain.


aankhon ke siyah halke khatam karne ke liye 1 chamach tamatar ke ras mein 1 chamach lemoo ka ras mila kar 10 se 15 minute tak halqon par lagayen aur phir pani se saaf kar len. Iss amal ko din mein kam az kam do baar dohranay se chand din mein aankhon ke siyah halqay khatam ho jatay hain.


Aankhon ki sujan aur jalan khatam karne ke liye raat ko sonay se pehlay chand qutar badam ke tail ya vitamin e ke 2 chamach pani mein mila kar aankhon par lagayen. Isskay ilawa green ya black tea bags ko 5 minute ke liye garam pani mein bigho kar kuch der keliye aankhon par rakhen.


Aankhon ki thakan aur jhanjhanahat dur karne keliye dhaat se banay 2 chamach fridge ya barf se bharay glass mein chand minute ke liye rakh den. Jab dono chamach achi terhan thanday ho jayen to inhen ankhen band kar ke un par rakhen. Iss amal ko din mein 1 martaba dhrane se aankhon ki thakan, jhanjhanahat aur sujan mein aaraam aata hai.

Honton ke liye beauty totkay



Pathay honton ko naram o mulaim banane ke liye 2 qatray kimo mael oil mein 2 qatray geranium oil aur 2 chaye ke chamach ailoo jail mila kar lip glows bana len, din mein 2 se 3 martaba aur raat ko sotay waqt honton par lagain. Chand din mein phaty hont naram o mulaim ho jayen ge. Saib ke beej pees kar un ka powder raat sonay se pehlay honton par lagayen, subah honton ko dho kar balai laga len, hont naram o mulaem ho jayen ge.


Motay aur badsurat honton ko patla aur khubsurat banane ke liye raat ko sonay se pehlay zafran (saffron seeds) ke chand danay pani mein bigho kar honton par lagayen. Chand din ke istemaal se hont putlaay aur khobsorat ho jayen ge. Arq e ghulaab aur phatkari ko mila kar honton par lagayen, chand din mutawatar aisa karne se hont patlaay aur surkh ho jayen ge.


Siyah honton ko gulabi banane ke liye ek plate mein 1/2 chamach lemoo ka ras aur 3 chhootey chamach shakar (brown sugar) daal kar inhen halka garam kar len. Isskay baad is mein 1 chamach shehad daal kar itna mix karen ke gaarha paste ban jaye. Rozana raat ko sonay se qabal is paste ko honton par lagayen aur subah garam pani se dho len, chand din mein siyah hont gulaabii ho jayen ge. Isskay ilawa honton ko gulaabii bananay ke liye Roghan badam mein shehad mila kar din mein 2 baar honton par lagayen.


Honton ko naram o mulaim aur jazib nazar banany ke liye din mein aik dafaa honton par thanda Arq ghulaab lagayen. Isskay ilawa raat ko sotay waqt doodh ki balai ko honton par achi terhan laganay se poora din honton ki chamak barqarar rehti hai aur hont gulaabii nazar atay hain.

Balo ke liye beauty totkay



Balo ko chamakdar aur ghana banane ke liye inhen dhone ke baad kachay pani ka nariyal lagayen. Rokhay balon mein ronaqe bananay ke liye 4 khanay ke chamach dahi mein 2 khanay ke chamach mehndi aur 1 chaye ka chamach nariyal ya Zaitoon ka tail mila kar achi terhan balon mein lagayen aur 20 minute baad dho len. Yeh amal hafta mein kam az kam 2 baar zaroor dohrayeen.


Balo ki khushki khatam karne ke liye khushk balon mein 1 khanay ka chamach namak daal kar massage karen aur chand minute baad shampoo se sir ko dho len. Agar sir mein zakham waghera hon to yeh tareeqa istemaal nah karen. Muthi bhar neam aur tulsi ke pattay le kar pani mein ubaal len aur is se sir dho len. Yeh amal rozana dohrayeen chand dinon mein khushki khatam ho jaye gi.


Agar baal toot ya jhad rahe ho to, 1 pyaaz ka ras nikaal kar sir par massage karen aur 4 ghantay baad sarson ka tail laga kar neem garam toliye se sir ko dhaanp len aur phir balon ko dho len. maithi ke beej girtay balon ke liye behtareen hain. Maithi ke beej aur anda aik sath maal kar balon par lagayen aur khushk honay par dho len.


Balo se joen aur likhen khatam karne ke liye raat ko sonay se pehlay Vaseline petroleum jelly balon ki jaroon se le kar suron tak lagayen. Aur plastic ki topi pehan len. Subah uth kar shampoo se sir dho len. Iss tareeqay se joyen bhi mar jayen gi aur un ke anday bhi khatam ho jayen ge. Neam ki banoli ke beej ka tail sir mein laganay se bhi joyen mar jati hain.

Hathon aur paon ke liye beauty totkay



Agar aap ke hatho ki hatheliya sakht aur khdri hai to 1 chamach lemon juice mein 1 chaye ka chamach shakar (brown sugar) milaain aur hathelion par laga kar aahista aahista ragrain. Iss amal ko 3 se 4 din tak rozana dohrayeen haath naram o mulaem ho jayen ge.


Hathon aur paon se jhuriyan khatam karne ke liye kisi bartan mein aadha chamach haldi aur 2 khanay ke chamach balai achi terhan mix kar ke hathon par massage karen. Aur 20 minute baad hathon aur peeron ko dho len. haftay mein 3 martaba kisi bhi waqt is amal ko dhraya ja sakta hai. Iss amal se hathon aur peeron mein blood circulation taiz ho gi aur un par banane wali jhuriyan khatam ho jayen gi.


Hathon aur paon ki rang gora banane ke liye doodh aur shehad mila kar hathon aur peeron par sabun ki terhan lagayen aur thori der baad dho len. Hathon aur paon ki jild ko naram o mulaem aur khobsorat bana ne ke liye Arq ghulaab ke chand qatroun mein 1 chaye ka chamach balai aur thora sa shehad mila kar hathon par lagayen.


Neem garam pani mein 2 chamach sirka aur 2 chamach Skimmed milk daal kar is mein 15 minute tak pao dboyin. Phir foot filer se airion ko aahista aahista ragadnay ke baad dho len. Iskay baad paon ko khushk kar ke un par petroleum jell se achi terhan laip kar ke jarabay pehan len. Yeh amal hamesha raat sonay se pehlay chand din tak dohrayen airian naram o mulaem ho jayen gi.

About the author

Beauty

Zubaidabeauty.com Pakistan ki pehli Urdu Website hai jahan mard o khawateen beauty tips, makeup tips, health tips, wazan kam karne ki tips, aur bohat se mufeed gharelo totkay Roman Urdu mein parh satke hain.

Add Comment

Click here to post a comment

Adsense Ads